ТУТАНХАМОННИНГ МУҲРИ

Билсам, шу чоққача ақлим етмаган ишларга бурун суқиб юрган эканман. Эҳтимол, ҳаммасига, ўлчаса бир қарич ҳам чиқмайдиган елкамдаги ташвишлар айблидир? Ўзимни эмас кўпроқ одамларни ўйлаганимми ё?  Кўзгудаги акс ҳира тортган кўзни пана қилган кўзойнакка қудрат бўлиб кўрингани учунмикин? Балки менга тикилган нигоҳлар ҳаққини мутлақо адо этмаганим, этолмаётганим учундир?  Қайдам. Лекин, барибир яхши иш бўлмади. Майли, ҳар ҳолда, уруниб кўрдим-ку. Эл қатори юравериш керак эди. Охирги хулоса шу!

Биласизми,  бугун оёғимиз остидан чиққан бало, дуч келганимиз чигал вазиятни биздан аввал саккиз, ўнта кўйлак йиртиб, мингта хўроз қичқириғини эшитган одам бошдан кечирган. (булар янгилик эмас, демоқчиман) Мен қилган хатони такрорламанглар, деб ўтмишдан келажакка сергаклантирувчи хабар юборган. Ўқимаймизда шуни. Шунинг учун кўрсатилган равон йўлдан юрмай, эгри-бугри йўлга оғиб кетаверамиз. Қон билан кирган, жон билан чиқади. Ёки мен ноҳақ гап айтаяпманми?

Билишармикин, қачонлардир ҳамма учун оламшумул янгилик бўлган такрори йўқ ноёб тизим бугунги кунга келиб батамом эскиргани, муайян доира бундан фақат азият чекаётгани, маълум соҳа эгалари шу соҳанинг каттасига, унинг, икки оғиз гапи – бўлади ё бўлмайдисига илҳақ бўлиб тонгга довур ўтиришини, янгича усулдаги ишга, замонавий фикрлайдиган тизим мутасаддисига муҳтожлик сезаётганини? Саволим жуда узунлашиб кетди-а? Қисқаси, кўпчилик ёмон кўрадиган ҳалиги океан ортидаги бирлашган мамлакатлар борку, ўшанинг етакчиси ишламас экан, тизим ишлар экан. Маёқ кўтарган шоввозчи, ўшанинг кўзига кўринмайдиган мамлакат етакчиси эса фақат ўзи ишлар экан, тизим ишламас экан.

Биламиз, ҳаммамиз кўникувчан, мослашувчанмиз. Тавба, инсон сўзининг луғавий маъноси ҳам аслида шу экан. Иродамиз, сабр-бардошимиз Саҳрои Кабир жазирамасида обдон тобланган. Чурқ этмаймиз. Оғзимизга Тутанхамоннинг муҳри ёпишип қолган.